Mögnuð óvissuferð 2007  

Óvissuferð Æskulýðsdeildar Mána var farin 19. apríl á sumardaginn fyrsta. Þessi ferð var sko ekki síðri en ferðin sem farin var í fyrra.    
Við lögðum af stað frá Mánagrund kl 9:15 og var ferðinni haldið inn í Sandgerði. Við skoðuðum Fræðasetrið í Sandgerði og var þar margt skemmtilegt að sjá.    
Eftir fræðasetrið var ferðinni haldið í Reykjavík og stoppað í Egilshöll. Þar fór hópurinn á skauta. Það leyndust margir efnilegir listskautarar í hópnum og má þar helst nefna Hauk Aðalsteinsson. Hann sýndi afar fallega takta og tilburði. En við skulum ekkert fara nánar út í það.    
Eftir Egilshöllina var ferðinni haldið á Stokkseyri. Við fórum á Veiðisafnið. Þar var heill hellingur af uppstoppuðum dýrum. Gíraffi, Sebrahestur, Antilópur, Villisvín og margt fleira. Eftir Veiðisafnið var farið á nýtt safn á Draugasetrinu sem heitir Álfar, tröll og norðurljós. Þetta er virkilega skemmtilegt og flott safn og höfðu krakkarnir mjög gaman af þessu og fóru margar ferðir í gegn.    
Eftir Stokkseyri var ferðinni haldið austar. Við fórum í hestasundlaugina á Ási. Þar tók hann Jakob á móti okkur og sýndi okkur hvernig Þóroddur frá Þóroddstöðum tók nokkra sundspretti. Eftir sundið var svo haldið á bæinn Hvol. Þar tóku hjónin alveg glæsilega á móti hópnum og buðu krökkunum upp á ís og svala. Svo fór Þorvaldur í hnakkinn og sýndi okkur hinn magnaða hest Rökkva frá Hárlauksstöðum.   
Að lokum var farið í keiluhöllina og spiluð diskó keila. Þegar allir voru búnir að spila var haldið inn í veislusalinn og þar beið okkar pizzuveisla. Svo var ferðinni haldið heim og var hópurinn kominn til Keflavíkur aftur kl 20:30 Langur en alveg magnaður dagur.   
Ferðin gekk í alla staði vel enda þarna frábær og prúður hópur á ferð. Æskulýðsnefndin þakkar krökkunum afar skemmtilega ferð. Hérna eru myndir frá ferðinni. Myndirnar virðast ekki sjást á yfirlitinu en klikka þarf á hvern myndarramma og þá kemur myndin.

Frábær óvissuferð 2006   
        
Óvissuferð Æskulýðsdeildar Mána heppnaðist alveg frábærlega og var þetta alveg magnaður hópur af börnum, unglingum og ungmennum.

Lagt var af stað frá félagsheimilinu kl 8:30 og var ferðinni haldið austur. Mikill spenningur var í krökkunum því að þetta var sannkölluð óvissuferð. Það fékk enginn að vita neitt fyrr en komið var á áfangastað. Það var mikið spáð og spekúlerað hvert væri verið að fara og sá Æskulýðsnefndin líka um það að rugla svolítið í þeim svo að enginn gæti fattað hvert væri verið að fara. 
Ferðinni var haldið á Stokkseyri og var m.a. eitt platið á leiðinni þangað að við værum að fara á Litla hraun og skoða það.  Við beygðum inn á planið eins og við værum að fara þangað inn og það voru allir orðnir mjög spenntir að fá að kíkja inn í fangelsið og svo heyrðist bara ohhh... þegar við héldum áfram.   
En það var fljótt að gleymast þegar við vorum komin á fyrsta áfangastaðinn sem var Draugasetrið á Stokkseyri. Krakkarnir voru yfirsig hrifnir og fóru margir fleiri en einn hring í gegn.   
Svo var ferðinni haldið austar og enn vissi enginn neitt. Við stoppuðum á tjaldsvæðinu á Laugarási og borðuðum hádegismat þar og svo var farið í fótbolta og einhverjir fóru á róluvöllinn. Farið aftur upp í rútu og öllum sagt að spenna vel beltin því að nú væri löng leið framundan og að það væri bara gott að leggja sig aðeins. Keyrt var í 1/2 mínútu og þá var komið á næsta stopp stað sem var dýragarðurinn Slakki í Laugarási. Þar voru 20 daga gamlir kettlingar, mýs, rottur, kanínur, fuglar og fleira. Einnig var farið í pútt, billjard og pílu. Allir fengu ís áður en farið var aftur á stað.   
Farið var enn austar og enginn vissi um næsta áfangastað fyrr en þangað var komið og var það bærinn Pula hjá Daníeli Jónssyni. Daníel sýndi krökkunum hesthúsið og sagði þeim frá graðhestunum og hryssunum í húsinu. Ekki var einn geldingur í húsinu hjá honum.   
Ferðinni var haldið enn austar og var mikið sungið á leiðinni. Síðasti en ekki sísti áfangastaðurinn var Ármót hjá Hafliða Halldórssyni. Hann fór með krakkana um allt húsið og fræddi þau um starfið á Ármótum. Hafliði fékk að svara mörgum fróðlegum spurningum frá krökkunum. Svo var farið inn í veitingaskálann og þar beið krakkanna glóðaðir og gómsætir hamborgarar. Þetta borðuðu þau með bestu list og fóru svo upp í rútu og trölluðu alla leið heim en nokkrir voru líka orðnir þreyttir eftir langan dag og sváfu alla leiðina heim.   
 
Myndir frá óvissuferðinni


Til baka